Irutxuloko Hitza

Erakusketa

Lucien Herve argazkilariak Le Corbusierren obrari ateratako argazkiak daude Museum Cemento Rezolan ikusgai.

erredakzioa

1949ko azaroan Lucien Hervek Le Corbusierren l´Unite d´ habitation lana ren argazkiak atera zituen Marsellan. Egun bakar batean bere Rolleiflexarekin 600 argazkitik gora egin zituen. «Arkitektu arima du», esan zuen Le Corbusierrek irudiak ikustean, eta bere lana fotografiatzeko kontratatzea erabaki zuen. Handik aurrera Herve arkitekto frantsesaren begirada izan zen, 1950etik 1965era, Le Corbusierren heriotza arte.

Añorgako Museum Cemento Rezolak Herveren argazki orijinalen bilduma jaso du erakusketa batean. Guztira 30 irudi izango dira erakusgai martxoaren 1a arte. Jose Maria Etxarri FYM-Cementos Rezolako ohorezko lehendakariaren ustez, «Erretratu hauek bi artisten arteko harreman apartaren isla dira. Erakusketa honek gainera munduko eraikuntzaren garai heroiko baten espirituaren lekukotza ematen du. Arkitekturak hormigoi armatuaren bidez bere materialitate fisikoa nabarmendu zuenekoa».

Herverenak Le Corbusierren lanaren irudi ezagunak dira. Arkitekto frantsesaren eraikinen argiaren indarra, itzalak eta kontzeptu berriztatzaileak islatzea lortu zuen. Argazki erakusketa Le Corbusierren lanari buruzko azalpen panelekin eta Pariseko Le Corbusier fundaziotik ekarritako bi maketekin osatu dute.

Erakusketak irauten duen bitartean familientzako mini eskultura eta eraikuntza tailerrak izango dira astebururo.