Irutxuloko Hitza

Arrauna

Donostiarrak dagoeneko badu berezko trainerua; aurkezpenean taldeko arraunlariak aurkeztu dituzte.

naroa balsategi

Donostiarra uretaratzeko prest dago. Dagoeneko berezko trainerua du eta datorren astean Kiriko traineruarekin entrenatzen hasiko ez badira ere segituan estreinatuko dutela adierazi dute. Aurkezpenean taldea osatzen duten arraunlari guztiak aurkeztu egin dituzte.

Azken urteetan gertatu bezalaxe, Amilibiak egindakoa da eta 36.000 eurorengatik erosi dute. Iñaki Arana presidenteak adierazi duenaren arabera, «traineruaren lehenengo eskaera uztailean egin genuen, ondoren irailan eta beranduago urrian. Azkenean orain hilabete eta erdi hasi ziren egiten eta gaur ¬atzo¬ 11:00tan jaso dugu».

Azkenean, Kiriko

Traineruaren izena jakiteko eztabaida izan zutela onartu du Aranak. «Donostiako traineruaren izena hainbat patroik bete zezaketen baina azkenean Kiriko izan zen baldintza gehien betetzen zituen patroia. Azkenean hiriko traineruarekin Kontxako bandera gehien irabazi duen patroia izan da». Aurkezpenean, gainera, ama ponteko bezala Amaia Bontigi Kirikoren biloba eta Ainhoa Arteta sopranoa izan dira.

Klubeko presidenteak talde guztia denboraldia aurrera ateratzeko gogoz gainezka eta ilusioz dagoela adierazi du. «Gogoz gaude baina hiritarrei gauzak bapatean ezin direla egin esan nahi diegu. Poliki-poliki gora egin nahi dugu». Honela denboraldi honetarako helburua KAE Ligako lehen lau postuetan egotea dela esan du Aranak.

Gazteei eta emakumeei deia

Donostiarraren lehen denboraldia izango da aurtengoa baina etorkizunean traineru honek aurrera egiten jarraitu nahi du. Ondorioz, Aranak Donostiako gazteei dei egin die: «Orain arraunlari hauek ditugu baina datozen urteetarako gehiago nahi ditugu. Horregatik hiriko gazteek kirol serio bat egin nahi badute, gurera etortzen badira ateak zabalik izango dituzte».

Aranak ere emakumezkoen trainerua atera nahi duela esan du. «Primeran legoke emakumeak arraunean hasi eta traineru bat ateratzen lehenak izango bagina».